من خلقتي ماهمني هرجة اعداي
من خلقتي ما همني هرجة أعداي
اللي تحاول بالردى كسر ساقي
أصد عن بعض السواليف برضاي
لا جات من راع الهروج الدقاقي
أمشي على هوني وبالهون ممشاي
وأرقى سنود وباقي الناس باقي
بالعز والنوماس والجود مبداي
وحطيت من دون الرديين واقي
يعني على ممشاي ماتقصر اخطاي
في قمة الأمجاد بالوقت راقي
ويامدور الزله ومقصدك دعواي
ريح ركابك واتفق باتفاقي
خذها نصيحة لا تجي حول مرماي
لا تعترض لاهنت درب الطراقي
اتسوم لاكن منت بايع وشراي
شاقي على ما قالوا الناس شاقي
الشعر لأهله وأنت تأمل ومناي
يمكن تجي بأخر صفوفه لحاقي
الشعر من بين المعاليق جراي
لا صار عند اللي تحل الوثاقي
ثنتين والثنتين مع صملة الراي
الشاهد الله ما يجيها اختراقي
وانا على هوني وبالطيب مسراي
حاضر ومتواجد وبالعز هاقي
ومن ضاق صدره لاجل شوفي ولقياي
الله يريح خاطره في فراقي
|
العرض العادي
